DTV: Volleyball

 

 

Training:

Montag 20.15 Uhr, Sporthalle Büelen Nesslau

 

Volley Nesslau sucht eine Trainerin / einen Trainer! Bei Interesse oder Fragen melde dich bitte bei Marisa Schmid 079 462 80 64. 

Video

 


 

RVNO Plauschmeisterschaft

Seit der Saison 2018/2019 kann Volley Nesslau mit 3 Mannschaften an der Plauschmeisterschaft teilnehmen.

 

 Volley Nesslau 1 

v.l.n.r.:  Alexandra Grob, Heidi Guyer, Franziska Stüssi, Doris Frischknecht, Bettina Looser, Lydia van Winden, Anja Egli, Bea Schmid, Trainerin Patricia Bischof

 


 

 Volley Nesslau 2 

v.l.n.r.:  Sonja Tischhauser, Angelika Lusti, Daniela Hüberli, Doris Tischhauser, Janine Tischhauser, Trainerin Patricia Bischof, Marisa Schmid, Yvonne Moser,  Rita Zrgraggen, Silvia Tischhauser, Sandra Josi

 


 

Volley Nesslau 3

v.l.n.r.:  Patricia Bischof, Charlotte Marx, Luana Gantenbein, Tamara Kuratli, Julia Engel, Luzia Vetsch, Sonja Tischhauser, Susanne Lieberherr, Anina Baumgartner

es fehlen: Angelika Lusti, Marlis Kuratli

 


 

Berichte

Johresbricht Volleyball 2018

Noch üsere letschtä Vereinsversammlig isch für die Saison nur no 1 Spiel vor dä Tür gstandä: Die berüchtigtä Ebnater geg üsi riif Mannschaft. Leider het Voleka au das Johr ihren Titel verteidiget. Trotzdem hemmer viel chönä lernä us dem Spiel und profitieret für die nörchst Saison.

Als Saisonabschluss het üs t’Patricia en gmüetlichä Obet im Säntispark zum gemeinsamä Bowlä organisiert. Nochher isch die verdienti Osterpausä agseit gsii. I derä Ziit hemmer aber nöd fuuhl pausiert, sondern sind mit dä jungä Mannschaft a zwei Turnier, womer aber damol leider nöd gwunnä hend. Vilicht simmer jo glich besser wemmer nöd schlofet und no öbbä es Gläsli Wii gha hen.

Scho bald hemmer in alter Frische witer trainiert. Sitem April hemmer diversi Schnuppis gha, wo den au bald zu üsem Verrein dezuetretä sin. Das het üs sehr gfreut, mer dörfet nämli mit Stolz sägä, dasmer dajohr 7 neui Mitglieder hend dörfä ufnä! Alli hend scho Erfahrigä vom Schuelvolleyball mitbrocht und sich au schnell i üses Team igfundä.

Bevor die neu Saison aber agstandä isch, hemmers üs am 2. Juli im Restaurant Gadä bi feinem Essä guet go lo! Es paar sportlichi under üs hend vorem Essä no en gmüetlichä Obetschwumm im Schwendisee uf sich gno. S’Trinkä hemmer us üsne Aspiilfähler und em z’spoht cho chönä finanzierä. Aschlüssend sind den au scho t’Summerferie gsi, womer bi dem wunderschönä Wetter zum Beachä gnutzt hend.

Am 13. August 2018 isch den s’strenge Hallätraining als Vorbereitig für die kommend Saison wieder gstartet. Wilmer so viel neui Gspänli hen dörfä ufnä, hemmer das Johr sogär drü Mannschaftä a t’Meisterschaft chönä ameldä: Nesslau 1(Ü35), Nesslau 2 (Ü20) und Nesslau 3 (jung):

Saison Team Nesslau 1: Üsi riferi Mannschaft isch am 14.11.18 mitme 3:0 Sieg geg Engelburg super i t’Saison gstartet! Am 19.11.18 und am 3.12.18 isch den scho dä zweiti und dritti Match geg Gommiswald und Voleka vor dä Tür gstandä, wos den leider weg mehrere Eigäfehler verlorä hend. No vor dä Wiehnacht am 17.12.18 isch den dä Match geg die jünger Generation (Nesslau 2) agstandä. Au dä hens trotz vielem Kämpfä mit 3:0 verlorä. Die erstä zwei Sätz sind aber mit 25:23 sehr knapp usgfallä. I t’Rückrundi sins den am 16.01.2019 mitme Sieg geg Gommiswald guet is neue Johr gstartet. S’Glück isch am 11.2.19 leider scho wieder zu dä Gegnermannschaft grutscht, wo mit 3 knapp gwunnenä Sätz dä Sieg noch Engelburg brocht hen. Jetzt stoht nurno dä Match geg Voleka am 7.03.2019 und geg Nesslau 2 am 11.03.2019 i dä Sporthallä Büelä vor dä Tür.

 

Saison Team Nesslau 2: Am 17.9.2018 isch Nesslau 2 mitere 3:0 Niederlag geg Engelburg eher holperig i t’Saison gstartet. Dass Sie besser is Spiel findet, göns am 26.10.2018 as alljöhrige Volleyturnier in Engelburg. Das het den au gnützt und so hens dä zweiti Match i därä Saison geg Gommiswald mit starchä Blöck und Smashes  mit  3:1 chönä für sich entscheidä. Grad e Wochä spöter isch den s’Spiel geg üsi Titelverteitiger Voleka agstandä. Leider isch üsi Mannschaft zum Kanonäfuetter vo Voleka wordä und het ä Niederlag müese isteckä. Am 17.12.18 hens wie vorher scho erwähnt Ihrä ersti Sieg geg üsi «älterä» miteme super zämäspiel chönä fiirä. Gstärcht vom Wiehnachtsessä holt üsi Ü20 Mannschaft i dä Rückrundi den dä Sieg uf Nesslau mit 3:1 geg Egnelburg. En knappä Monet spöter, am 18.02.19 hemmer s’Rückrundispiel geg Voleka in Agriff gno. Mit eim gwunnenä Satz sins zfriedä gsii, hend aber immer no s grosse Ziel vor Augä Voleka z’gwünnä! Am 4. März 2019 isch Nesslau 2 viel z’selbstsicher in Match geg Gommiswald gstartet, wils letschtmol so locker gwunnä hend. Leider hens aber dasmol dä Heimmatch knapp müese verlüre. Dä aschlüssend Apéro isch aber glich no seeeeeehr fein gsi noch dem Kampf!:-) Mer freuet üs au dä Mäntig um lutstarchi Unterstützig bi üsem Heim-Heim Match!

Saison Team Nesslau 3: Üsi jung Mannschaft het sich us de Neu dezuegstossne zämägstellt wo nochher hoffentli au ufgno werdet.;-) Do sie fliessig im Training erschiene sind und schnell grossi Fortschritt gmacht hend, hemmer au Sie im August a dä RVNO Plauschmeisterschaft agmoldä. Am 17.09.2019 het au üsi jung Mannschaft ihren erstä Match in Agriff gno. Dä isch leider no es bitzeli früeh gsi, und so hend sie die ersti Niederlag geg Wattwil müese isteckä. Bi dä erstä Matches sind dä junge Nesslauerinä immerno t’Abnahmä zum Verhängnis wordä, sodass sie nie richtig is Spiel gfundä hend. Mit guetä Abnahme- und Ufstelligstrainings vo dä Patricia hend sie sich aber immer besser kennäglernt und sich so dör t’Vorrundi kämpft. So sind au t’Päss und t’Smashes immer besser wordä. Für da sins den au vo Ihrnä Gegner i dä Rückrundi globt wordä, den au die hend ihri Fortschritt bemerkt. Mer freuet üs, dass mer mit eu nomol so e motivierts Team hend und üsä Verrein so gwachsä isch.

Trotz vielnä schönä Moment hemmer leider au chli es «harzigs» Johr gha. Mer sind üs im Team nöd immer ganz einig gsi. Leider hemmer dasjohr drüü Ustritt, woni mi a derä Stell au nomol für die Zit möcht bedankä. Mer hend vo eu viel chönä lernä und profitierä! Au für dä Verrein hender viel Isätz gleistet! Drunder isch au üsi Trainerin t’Patricia, au dir nomol Dankä für die intensive und coole Trainings, wo du jedesmol für üs planet hesch. Es wör üs freue, wemer eu wiedermol amne Match oder Turnierli atreffet wöret.

Trotz allem luegemer optimistisch is neue Johr und hoffet dasmer bald wieder en neue Trainer/Trainerin findet. I freu mi uf sportlichs Johr mit eu!

 

 

Jahresbericht Volleyball 2017/2018

Noch üsere letschtä Vereinsversammlig hend üsi zwei Mannschaftä no die letschtä 3 Spiel vo dä Rückrundi in Agriff gno. S 1. Mol isch üsä letschti Match nöd gegä Ebnat gsi, sondern Nesslau 1 geg Nesslau 2. So het üseri rieferi Generation am 27. März churzä Prozess mit üs jungä gmacht und so dä Match mit 3:0 für sich entschiede. Bim alljöhrlichä Apéro hen mer ufs Saisonendi mit üsnä Fans und mit dä Mannschaft agstossä und so dä Obet gmüetlich usklingä lo. Leider hets mit üsnä zwei neu zämegstelltä Mannschaftä nur für diä letschät Plätz uf dä Ranglistä glanget. Da isch aber nöd witer schlimm gsi, sondern het üs gstärcht und motiviert für diä neu Saison.

Nochere churze Verschnufpause im April simmer alli motiviert und erholt zruck is Training cho. Und glii isch scho üsi nöchsti Herusevorderig vor dä Tür gstandä. Diä jung Mannschaft het nämlich dasjohr s erstmol amne Turnfest, wo z Wattwil stattgfundä hät, mitgmacht. Mit viel Spass hend mir Nesslauerinnä am 23. Juni üs dur das Turnier kämpft und am Schluss ufem erstä Platz dä gross Früchtechorb chönä entgegä nä . Das hemmer den au bis tüf it Nacht iä gfiiret!

Wo den t Saison immer nöcher cho isch, hemmer au das Johr nöd müese überleggä ob mer wieder wönd zwei Mannschaftä a dä Plauschmeisterschaft ameldä. Mir hend nämlich zwüschet Juni und Dezember acht neui Gspänli dörfä ufnä, wo üsi zwei Mannschafte super ergänzt hend. Mit strengä aber lehrrichä Trainings vo dä Patricia simmer den glii parat gsi für diä neui Saison!

Mitme guete Start het sich s Team 1 mit eim verlornä und 4 gwunnene Matches super dör t Vorrundi kämpt. So sinds noch dä Vorrundi ufem 2. Platz direkt noch de Titelverteidiger vo Ebnat-Kappel gstandä. Au diä jungä Nesslauerinne sin mit dä erstä drü Sieg geg Wattwil, Gommiswald und Wila super it Vorrundi gstartet. Bis sie den aber im Dezember geg Volley Ebnat-Kappel und  Volley Nesslau 1 zweimol ä 3:0 Niederlag hend müesä istecke. Es het aber au für sie no uf än guetä 3. Platz nocht dä Vorrundi glangät.

Wil diä Saison so guet gstartät isch, hemmer au dasjohr im Oktober wieder ä Mannschaft am Volleyballturnier in Waldkirch agmoldä, wie fast jedes Johr. Mit enrä gmischtä Mannschaft vo üsne zwei Teams hemmer au das Turnier für üs chönä entscheidä, vor 9 witerä Teilnehmer. Sotig Turnier schweisset üs jedesmol no meh zu eim grossä Team zämä.

Am 1. Dezember het den dä vo üs organisiert Chlausobät stattgfundä. Mitmä chlinä Spaziergang am Thurweg no und me feinä Apéro i dä Büehlerbrogg hemmer dä Obet ihgstummä. Im Gämsli Neu St. Johann hemmer es feins Raclette dörfä gnüssä bevor dä Chlaus nochher einigi in Sack packt het. Trotz denä vielä Sündenä hemmer no en gmüetliche Obet mitem ganzä DTV chönä gnüssä.

S'Johr het für beidi Mannschafte mitme Match gstartet, wo nochher no erwähnt wird. Scho glii sind die zwei Turneröbet vor dä Tür gstandä, womer au bis früeh am Morge gschaffet und gfiiret hend. Wil üs das nonöd glanget het, hemmer am Sunntig druf mitmä gmischte Team amne Volleyballturnier in Berneck mitgmacht. Mit wenig oder gar kei Schlof und vilicht no es bizli Alkohol im Bluet, hemmer au da Turnier gwunnä! Jo, au mir hens nöd chönä glaubä! ;-)

Bi dä Meisterschaft isch s'junge Team mit zwei gwunnenä Matches super it Rückrundi gstartet. Am 15. Februar hemmer den üsä erst Match i dä Rückrundi verlorä, wiedermol gegä Ebnat-Kappel. S'erste Mol aber, hemmer ein Satz geg sie chönä gwünnä, was üs nomeh gstärcht und motiviert het, sie irgendwenn ganz vom Podest z schüssä! Die Niederlag isch schnell wieder vergessä gsi, wilmer grad scho wieder Afangs März en Sieg hend chönä fiirä, nämlich geg Wattwil.

Wo s'Team 2 guet gstartet isch, het s'Team 1 eher chli en holprigere Start gha. S'erste Spiel hens im Züribiet geg Wila ganz knapp mit 3:2 verlorä. Viel z'Siegessicher sind sie den au dä Match geg Wattwil am 22. Januar agangä. Als 3. Spiel isch den aber noch hartem Kampf geg Gommiswald endlich wieder en Sieg in Ussich gsi. Dä Höhepunk vo därä Saison isch den am 12. März wieder ahgseit, denn hend nämlich die zwei Nesslauerteams wieder gegenand gspielt. Diä Jungä hend dä Respekt vo dä Jungbliebnä nöd verlore und hend Ihnä so dä 3:1 Sieg mögä gönnä. Aschlüssend hemmer bi üsem alljöhrlichä Apéro mit üsem Team und usnä Fans chönä uf üsi super Saison astossä. Wo für diä Jungä do t Saison fertig isch, hend diä Älterä ihres letschte Spiel no vor sich. Am 19. März werdet sie Ihres letscht Spiel gegä Ebnat-Kappel uf sich nä. Mer freuet üs den uf lutstarchi Unterstützig i dä Sporthallä Büelen!

Das ganze Johr het üseri beide Mannschafte nomeh zu eim grossä Team zämägschweisst mit sehr viel Höhene und nur ganz wenig Tüfene. Mer hend soviel chönä lernä und üs wahnsinnig gsteigeret im Verglich zur letschtä Saison.Es het mi au riesig gfreut dasmer das Johr soviel neui Mitglieder hend dörfä ufnä. Es riesigs Dankä a s'ganze Team! Mit soviel motiviertä und ufgstelltä Gspändli macht s Volleyball spielä no viel meh Spass! Im Namä vom ganzä Team goht es grosses Dankäschön a t'Patricia, üsi superTrainerin. Ohni dini Isätz wäret die viele Sieg fast nöd möglich gsi! Dankä dasd dir jedesmol soviel Zit ninsch, zum mit üs ad Matches cho, und natürli au immer die super Trainings, wo üs zwor amel schochli schluchet. ;-) Dankä Vielmol!

 

 

Jahresbericht Volleyball 2016/2017

Noch üsere letschtä Vereinsversammlig hend mir, wie jedes Johr, no s'Endrundäspiel gegä Voleka in Agriff gno. Trotz langem kämpfe hemmer üs müese gschlage ge. Als Trostpriis hemmer vo üsne Gegner es feins Schoggiosterhäsli übercho. Trotz de Niederlag hemmer dä Obet mit üsne Fans und Genger bimene gmüetliche Apéro chöne usklinge lo. 

Nochere churze Verschnufpause im April simmer alli top motiviert zruck is Training cho. Das Johr dörfet mer nämlich vom grosse Glück rede, dass mer endlich e Trainerin gfunde hen: t Patricia Bischof vom Stei. Sie het scho früehner i üsem Verrein gspielt, het aber den 3 Johr mixt im Stei gspielt und nochher 6 Johr Chindlipausä gmacht.  Jetzt als Mami vo 2 Chind nint Sie sich jedä Mäntig obet Zit zum üsi Kondition und Technik z forderä.  Mit de Yvonne zäme, wo jedes Mol es super Iwärme macht, gstaltet  sie es abwechsligrichs und strengs Training. Danke viel Mol für eue Isatz und t'Zit woner eu nend!

T'Saison isch immer nöchher gruckt. Do mir das Johr drü neui Mitspielerinne gwunnä hend, hemmer üs entschiede zwei Mannschafte a de Plauschmeisterschaft azmelde, Nesslau 1 und Nesslau 2 oder: Nesslau älter und Nesslau jünger.;) So chön alli a de Meisterschaft mitmache und es mues niemmer uf de Ersatzbank sii. Gern helfet au beidi Teams enand us wemmer zwenig sind.

Scho glii isch t Spielplansitzig gsi, und es het sich usegstellt, dass Nesslau 1 und Nesslau 2 gegenand müend spiele. Das isch aber nöd witer schlimm gsi, denn au wenn mer jetzt zwei Mannschafte sind, simmer doch no eis Team.

Bevor t'Meisterschaft gstartet het, hend die junge Nesslauerine zu de Wattwiler en Trainingsmatch dörfe go spiele, wos im neu zämegsetzte Team scho s erst Mol gwunne hend. S git aber no viel zum lerne und verbessere! Churz drufabe het sich t Melanie entschiede, dass sie doch nomol e Saison z Arosa macht, sie zwor nöd is Training chunt, üs aber bi jedem Match unterstütz.

Mitti September het Nesslau 2 den scho de ersti Match, geg die neue gegner vo Wila gha. Leider hemmer üs scho bim iwärme vo ihrne Aspiel und Smash ischüchtere lo und so hend sie den de Match mit 3:1 chöne für sich entscheide. Scho 4 Täg spöter het au Nesslau 1 s erstmol mit de neue Mannschaft chöne an Match gege Ebnat-Kappel. Mit 3 zu 0 hend au sie geg die scho so lang igspielte Mannschaft nöd chöne standhalte. Gemeinsam hemmer noch dene erstä Niederlage a üsere Technik gfielet bis  den im Oktober de Heimmatch Nesslau 1 gegä Nesslau 2 gsi isch. Und man glaubt es kaum Nesslau het gwunnä juhee!! Es isch en strenge aber en lehrriche Match gsi, mit Fans wo für beidi gfanet hend und emne churze Liechtunterbruch vom Unihockey.

Churz drufabe hend die junge Nesslauerinne de Match geg t'Gommiswalder leider ganz knapp verlorä. Zwei Woche spöter isch au üsi rieferi Mannschaft zunere ganz knappe Niederlag gege üsi Zürcherinne vo Wila mit 3 zu 2 cho. Leider het sich t Lydia bi dem Match verletzt und isch für de Rest vo de Saison usgfalle. I dem Sinn wünschet mer de Lydia witerhin ganz gueti Besserig.  Im Dezember hend beidi Teams ihri letschte Vorrundispiel ahtrete: leider hend au die wieder beidi verlore. Mer chönti meine mer machet üs alles no. Mitem letschte und zweitletschte Platz simmer so im Januar id Rückrundi gstartet…leider au nöd mit viel meh Erfolg! Für das, dases aber die ersti Saison mit derä neue zämestellig gsii isch, simmer aber ziemlich zfriede. Us dene guete lange Ballwechsel hemmer viel chöne lerne und so möchtet mir mit de neue Erfahrige gstärcht i die neui Saison starte. Jetzt hemmer no die letschte drü Match vo de Rückrundi: nämlich dä Mäntig üsi älteri Grupper gege Gommiswald, am 23. März Nesslau 1 geg Voleka und am 27. März üse letschti Match gegenand, jung gäg es bizli älter.:) Bi üsem letschtä Match gits wie jedes Johr üse legendäri Apéro, wo ihr au ganz herzlich iglade sind. 

A derä Stell möchti mi ganz herzlich bi mine Volleyballgspänli bedanke, fürs fliessige Erschiene, euei motiviierti Art im Training, für die schöne zämespiel i dä Meisterschaft und natürli au für die gmüetliche Stunde womer ab und zue i de Beiz hend. Ihr sind es tolls Team!

Raiffeisenbank Obertoggenburg Berliner Sport Neff Werbung UW Garage